Afət Ziyadqızı
Rusiyanın gecə saatlarında Ukraynanın paytaxtı Kiyevə təşkil etdiyi hava hücumu nəticəsində iki nəfər ölüb, 10 şəhər sakini yaralanıb.
“Operativ Məlumat Mərkəzi-OMM” xəbər verir ki, bunu Kiyev meri Vitali Kliçko sosial media hesablarında açıqlayıb.
Onun sözlərinə görə, yaralılardan beşi xəstəxanaya yerləşdirilib. İki yaralının vəziyyətinin ağır olduğu bildirilib.
Hücum nəticəsində Kiyevin müxtəlif ərazilərində anbar və digər kommersiya obyektlərində, özəl məktəbin yerləşdiyi ərazidə, eləcə də yaşayış binalarında yanğınlar baş verib.
Bir sıra binalara və avtomobillərə ziyan dəyib. Hadisə yerlərində fövqəladə hallar xidmətlərinin əməkdaşları və bələdiyyə işçiləri fəaliyyətlərini davam etdirirlər.
Paytaxtda hava hücumu siqnalının hələ də qüvvədə olduğu bildirilib. Kliçko sakinləri təhlükəsiz yerlərdə qalmağa çağırıb.
