Rusiya Ukraynaya 157 PUA və 16 raketlə hücum edib

Rusiya Silahlı Qüvvələri gecə saatlarında Ukrayna ərazisinə müxtəlif tipli 157 pilotsuz uçuş aparatı (PUA) və 16 ballistik ilə qanadlı raketdən ibarət kütləvi hava zərbələri endirib.

“Operativ Məlumat Mərkəzi-OMM” xəbər verir ki, bu barədə Ukrayna Hərbi Hava Qüvvələri Komandanlığı rəsmi məlumat yayıb.

Hava hücumundan müdafiə (HHM) qüvvələrinin effektiv cavab tədbirləri nəticəsində hücum zamanı 124 PUA, eləcə də reaktiv mühərrikli kamikadze pilotsuz uçuş aparatı kimi tanınan 7 “Banderol/Dan-T” tipli kiçik qanadlı raket zərərsizləşdirilib.

Ukrayna Prezidenti Volodimir Zelenskiy bəyan edib ki, hücumlar əsasən Kiyev, Odessa və Sumi vilayətlərində mülki və kritik enerji infrastrukturlarını hədəf alıb. Ölkə üzrə ümumilikdə 8 regionda ciddi dağıntılar qeydə alınıb. Kiyev şəhərinin meri Vitali Kliçko paytaxtın bombalanması nəticəsində ən azı 18 dinc sakinin yaralandığını diqqətə çatdırıb.