OMM Redaksiyası
ABŞ ordusu İranın qabaqcıl silah sistemlərini quru sərhədlərindən və Xəzər dənizi vasitəsilə daşımasının qarşısını almaq üçün yeni əməliyyat qrupu yaradıb. AnewZ-nin məlumatına görə, ABŞ Mərkəzi Komandanlığı (CENTCOM) bildirib ki, Floridada yerləşən 20 nəfərlik qrup hökumətin İranın sanksiyaya məruz qalan materialları quru yollarla daşımasının qarşısını almaq səylərinə dəstək verəcək.
CENTCOM-un komandanı admiral Bred Kuper “Dəmir Qapı” əməliyyat qrupunun yaradılmasının ABŞ-ın İrana qarşı dəniz blokadasının uğurunu gücləndirdiyini deyib.
“CENTCOM-un ABŞ hökumətinin müxtəlif qurumları ilə əməkdaşlığının gücləndirilməsi İranın terrorizmi maliyyələşdirmək, silah fabriklərini bərpa etmək və hərbi ehtiyatlarını artırmaq imkanlarını daha da məhdudlaşdıracaq”, – Kuper bildirib.
Elan ABŞ Konqresinə nəzarəti Demokratlar Partiyasının ələ keçirməsindən bir neçə gün sonra verilib. Mənbə bunu seçicilərin yüksək qiymətlərdən və İrandakı müharibədən narazılığı ilə əlaqələndirir. “Dəmir Qapı” əməliyyat qrupu icra hakimiyyətinin tədbiridir və onun yaradılması üçün Konqresin təsdiqi tələb olunmur.
İrana qarşı dəniz blokadası iyuldan qüvvədədir
ABŞ-İran atəşkəsi pozulduqdan sonra Vaşinqton iyuldan etibarən İrana qarşı dəniz blokadası tətbiq edir. CENTCOM-un bildirdiyinə görə, İran limanlarına daxil olan və oradan çıxan gəmilərin qarşısının alınması nəticəsində ölkənin 25 milyard dollardan çox xam neft ixracı dayandırılıb.
Komandanlıq dənizdə məhdudlaşdırıcı tədbirlərin İran limanlarına daxil olan və ya oradan çıxan bütün gəmilərə qarşı davam edəcəyini bildirib. Humanitar yardım bu məhdudiyyətlərdən istisna təşkil edir.
İraqın xarici işlər naziri Fuad Hüseyn noyabrın 7-də “Əl-Cəzirə”yə bildirib ki, ABŞ Bağdaddan İranla sərhəddəki keçid məntəqələrinin əksəriyyətini bağlamağı rəsmən istəyib. Onun sözlərinə görə, Vaşinqton İraqla İran arasındakı keçidlərdən yalnız ikisinin açıq qalmasını, digərlərinin isə bağlanmasını istəyir.
Qətər isə şənbə günü ABŞ və İran arasında danışıqların uğursuzluğa düçar olması barədə xəbərləri təkzib edib və vasitəçilik səylərinin davam etdiyini bildirib.
