OMM Redaksiyası
"Rusiyadan ABŞ-yə ilk dizel yanacağı partiyasının göndərilməsi oktyabrın 22-nə planlaşdırılıb".
“Operativ Məlumat Mərkəzi-OMM” xəbər verir ki, bu sözləri Rusiyanın Baş nazirinin müavini Aleksandr Novak deyib.
Novakın sözlərinə görə, 40 min ton tutumlu ilk tanker oktyabrın 22-də ABŞ-yə yola düşəcək. Onun ardınca digər yanacaq partiyalarının da göndərilməsi nəzərdə tutulur.
Baş nazirin müavini müvafiq müqavilənin imzalanmasının yekun mərhələdə olduğunu bildirib.
O əlavə edib ki, dizel yanacağının digər ölkələrə tədarükünün istiqaməti ABŞ-nin cari tələbatını ödəmək üçün tələb olunan həcmdən əlavə Rusiyanın nə qədər yanacaq ixrac edə biləcəyindən asılı olacaq.
"Düşünürəm ki, dizel yanacağı digər ölkələrə də çatdırılacaq. Biz ixracı əvvəlki tam həcmdə deyil, neft emalı zavodlarımızın imkanları daxilində bərpa edirik. Buna görə də əvvəlki ixrac həcminə yalnız ilin sonuna doğru çata bilərik. Bundan sonra digər ölkələr də əvvəl aldıqları həcmdə yanacaq əldə edə bilərlər", - Novak bildirib.
Qeyd edək ki, ABŞ Prezidenti Donald Tramp və Rusiya Prezidenti Vladimir Putin arasında telefon danışığından sonra Vaşinqton Rusiyadan dizel yanacağının tədarükünə tətbiq edilən sanksiyaları yumşaldıb.
Bildirilib ki, Moskva bir neçə mərhələdə təxminən 1,8 milyon ton dizel yanacağı ixrac edəcək.
