İran parlamentinin sədri Məhəmməd Baqer Qalibaf ABŞ Prezidenti Donald Trampın Tehranla danışıqlar prosesi ilə bağlı həqiqətə uyğun olmayan məlumat yaydığını bildirib.
“Operativ Məlumat Mərkəzi-OMM”-in məlumatına görə, İran parlamentinin sədri bu barədə "X" sosial şəbəkəsində yazıb.
"Amerika Prezidenti bir saat ərzində yeddi bəyanat verib və onların heç biri doğru deyil", - Qalibaf yazıb.
O, həmçinin vurğulayıb ki, Vaşinqton danışıqlar prosesində Tehranın bütün tələblərini yerinə yetirməsinə nail ola bilməyəcək.
Qalibaf həmçinin ABŞ-nin Fars körfəzindəki İran limanlarının blokadasından imtina etməyəcəyi təqdirdə İranın Hörmüz boğazını yenidən bağlamağa hazır olduğunu təsdiqləyib.
Cümə günü Donald Tramp "Truth Social" sosial şəbəkəsində bir sıra paylaşımlar edib. O, İranın nüvə proqramını ləğv etməyə razı olduğunu və zənginləşdirilmiş uran ehtiyatlarını ABŞ-yə təhvil verməyə hazır olduğunu iddia edib.
Xatırladaq ki, 2026-cı il fevralın 28-də ABŞ və İsrail İrana qarşı hərbi əməliyyata başlayaraq, bir neçə şəhərə hava hücumları həyata keçiriblər. Elə həmin gün İranın Ali lideri Əli Xamenei zərbələr nəticəsində öldürülüb. Buna cavab olaraq İran İsrailə raket zərbələri endirib və Fars körfəzindəki Amerika hərbi bazalarına hücum edib.
İran, ABŞ və onların müttəfiqləri aprelin 8-ə keçən gecə iki həftəlik atəşkəs barədə razılığa gəliblər.
Aprelin 11-12-də Pakistanın vasitəçiliyi ilə İslamabadda İran və ABŞ arasında nəticəsiz başa çatan danışıqlar aparılıb.
