Afət Ziyadqızı
Rusiya Prezidenti Vladimir Putin Rusiya-Afrika sammitinin plenar iclasında çıxış edərkən Aleşki yaşayış məntəqəsində yaxın saatlarda humanitar əməliyyatın keçiriləcəyini bəyan edib.
Redaktor.az xəbər verir ki, bu barədə "Sputnik Armenia" məlumat yayıb.
Əməliyyat mülki əhaliyə təcili yardımın göstərilməsini nəzərdə tutur. Rusiya Silahlı Qüvvələrinin Baş Qərargah rəisi, ordu generalı Valeri Gerasimov Xerson istiqamətində hərbi əməliyyatların müvəqqəti dayandırılacağını və Aleşki ərazisində humanitar missiya ilə əlaqədar 27 oktyabr 2026-cı il tarixi saat 04:00-dan etibarən "sükut rejimi"nin tətbiq edildiyini açıqlayıb.
Putin Ukrayna tərəfinin şəhərə gedən yolları minalayaraq humanitar fəlakət şəraiti yaratdığını iddia edib. Rusiya lideri bu missiyanın təşkilində ABŞ-nin birinci xanımı Melaniya Trampın rolunu xüsusi vurğulayıb: "Bu günlərdə, bu gün-sabah, ABŞ-nin birinci xanımının dəstəyi ilə mülki əhaliyə yardım əməliyyatı planlaşdırılıb".
Ağ Ev də öz növbəsində Aleşkidə humanitar əməliyyatın keçirilməsi üzrə razılaşmanın əldə olunmasında Melaniya Trampın əsas rol oynadığını təsdiqləyib. Birinci xanımın ofisindən bildirilib ki, o, Rusiya və Ukrayna rəhbərliyi ilə aparılan birbaşa danışıqlarda şəxsən iştirak edib.
Ukraynadakı ümumi vəziyyətdən danışan Rusiya Prezidenti Moskvanın münaqişənin sülh yolu ilə həlli imkanları üzərində işləməyə davam etdiyini əlavə edib.
