Afət Ziyadqızı
Rusiya Federasiyasının Prezidenti Vladimir Putin ilə Birləşmiş Ştatlar Prezidentinin xüsusi elçisi Stiv Uitkoff arasında Sankt-Peterburq şəhərində keçirilən yüksəksəviyyəli qapalı danışıqlar başa çatıb.
“Operativ Məlumat Mərkəzi-OMM”-in Kremlin mətbuat xidmətinə istinadən yaydığı məlumata əsasən, Konstantinovski sarayında baş tutan görüş təxminən üç saat davam edib.
Mühüm diplomatik konsultasiyalarda Rusiya tərəfindən Prezidentin köməkçisi Yuri Uşakov və xarici ölkələrlə investisiya-iqtisadi əməkdaşlıq üzrə xüsusi nümayəndə, Rusiya Birbaşa İnvestisiyalar Fondunun (RFPI) rəhbəri Kirill Dmitriyev iştirak ediblər.
Rəsmi mənbələrin bildirdiyinə görə, danışıqlar masasında Ukrayna münaqişəsinin kəskin fazadan çıxarılması və siyasi-diplomatik yolla nizamlanması, Moskva ilə Vaşinqton arasında ticarət-iqtisadi əməkdaşlığın gələcək perspektivləri, eləcə də Yaxın Şərqdə kəskinləşən İran böhranı daxil olmaqla, qlobal təhlükəsizlik arxitekturasına dair strateji məsələlər ətrafında geniş fikir mübadiləsi aparılıb.
Görüşün yekununda ABŞ nümayəndə heyətinin korteji Konstantinovski sarayının ərazisini tərk edib. Ekspertlər Sankt-Peterburq görüşünü Moskva və Vaşinqton arasında birbaşa dialoqun bərpa olunması istiqamətində mühüm diplomatik addım kimi qiymətləndirirlər.
