Dmitri Peskov Putin və Trampın telefon danışığını şərh edib

Kreml Putin və Tramp arasında telefon danışığının detallarını açıqlayıb.

“Operativ Məlumat Mərkəzi-OMM” xəbər verir ki, bu barədə “RİA Novosti” agentliyi məlumat yayıb.

Məlumata görə, Kremlin mətbuat katibi Dmitri Peskov bildirib ki, Rusiya Prezidenti Vladimir Putin və ABŞ-nin Prezidenti Donald Tramp arasında baş tutan telefon danışığı Moskva üçün öz mövqeyini birbaşa çatdırmaq baxımından mühüm əhəmiyyət daşıyıb.

Bildirilir ki, Peskov bu təması Kiyev və Avropanın münaqişənin eskalasiyasına yönəlmiş siyasəti ilə bağlı Rusiyanın mövqeyini ABŞ rəhbərliyinə çatdırmaq üçün “əlverişli fürsət” kimi qiymətləndirib.

Qeyd olunur ki, Kremlin sözçüsü Donald Trampın mövqeyini “ardıcıl” adlandıraraq onun Ukrayna münaqişəsi ilə bağlı öz baxışına sahib olduğunu vurğulayıb.

Məlumata əsasən, tərəflərin gələcəkdə də təmasları davam etdirmək barədə qarşılıqlı anlaşmaya malik olduqları bildirilib. Telefon danışığının təxminən 1 saat 25 dəqiqə davam etdiyi qeyd olunur.

Bildirilir ki, Rusiya Prezidentinin köməkçisi Yuri Uşakov da söhbəti “işgüzar və konstruktiv” kimi qiymətləndirib.