Afət Ziyadqızı
Rusiya Prezidenti Vladimir Putin ABŞ Prezidenti Donald Trampla növbəti görüşün keçirilməsi ideyasına prinsiqcə açıqdır. Lakin belə bir sammitin öncədən əsaslı və lazımi texniki-diplomatik hazırlıq aparılmadan təşkil edilməsi məqsədəuyğun hesab olunmur.
“Operativ Məlumat Mərkəzi-OMM” xəbər verir ki, bu barədə Rusiya Prezidentinin mətbuat katibi Dmitri Peskov jurnalistlərə açıqlamasında bildirib.
Peskov vurğulayıb ki, Rusiya və ABŞ liderləri telefon danışıqları zamanı ehtiyac yarandıqca ikitərəfli təmasları davam etdirməyə hazır olduqlarını dəfələrlə ifadə ediblər. Bununla belə, Kreml rəsmisinin sözlərinə görə, ekspertlər və nümayəndə heyətləri səviyyəsində ilkin işlər görülmədən təşkil olunan yüksək səviyyəli görüşlər gözlənilən nəticəni verə bilməz və sadəcə vaxt itkisi ilə nəticələnər.
Mətbuat katibi Vladimir Putin ilə Ukrayna Prezidenti Vladimir Zelenski arasında ehtimal edilən birbaşa danışıqlar mövzusuna da toxunub. Peskov bəyan edib ki, belə bir görüş yalnız tərəflər arasında konkret razılaşmaların yekun olaraq rəsmiləşdirilməsi və imzalanması mərhələsində mümkündür. Liderlərin heç bir ilkin layihə və ekspert razılığı olmadan sadəcə müzakirə xatirinə bir araya gəlməsi Rusiya tərəfi üçün məqbul sayılmır.
Bundan əvvəl ABŞ administrasiyasının rəhbəri Donald Tramp BMT Baş Assambleyası çərçivəsində verdiyi bəyanatda Putinin Ukraynadakı münaqişəyə son qoymaq məqsədilə danışıqlara hazır olduğunu bildirmişdi.
