Ermənistanın Baş naziri Nikol Paşinyan hökumətdə kadr islahatları aparmaq niyyətində olmadığını açıqlayıb.
"Operativ Məlumat Mərkəzi-OMM" xəbər verir ki, İrəvanda keçirilən brifinqdə çıxış edən hökumət başçısı bildirib ki, hazırkı vitse-premyerlər və nazirlər öz vəzifələrində qalacaqlar.
Bununla belə, o, idarəetmənin digər pillələrində müəyyən dəyişikliklərin olacağını istisna etməyib.
Xatırladaq ki, 2026-cı il iyunun 7-də keçirilən parlament seçkilərinin rəsmi nəticələrinə görə, ölkənin ali qanunverici orqanına üç siyasi qüvvə daxil olub.
"Vətəndaş müqaviləsi" partiyası 49,7456% səs toplayaraq 64 mandat əldə edib. "Güclü Ermənistan" bloku 23,2710% səslə 29 mandat, "Ermənistan" bloku isə 9,9231% səslə 12 mandat qazanıb. "Çiçəklənən Ermənistan" partiyası isə 4%-lik baryeri keçə bilməyərək parlamentdən kənarda qalıb.
Beləliklə, hakim "Vətəndaş müqaviləsi" partiyası parlamentdə çoxluğu qoruyub saxlasa da, Konstitusiyaya birtərəfli qaydada dəyişiklik etmək üçün tələb olunan konstitusion çoxluğa malik deyil.
Qeyd edək ki, seçki nəticələri ilə razılaşmayan 7 siyasi qüvvə, o cümlədən "Güclü Ermənistan", "Çiçəklənən Ermənistan" və "Ermənistan" blokları iyunun 19-da seçkilərin nəticələrinin ləğvi tələbi ilə Konstitusiya Məhkəməsinə müraciət ediblər.
