OMM Redaksiyası
Nərmin Abdinova 18 yaşadək şahmatçılar arasında Avropa çempionatında doqquz turda doqquz qələbə qazanaraq qızıl medal əldə edib. O, Azərbaycan Şahmat Federasiyasının rəsmi saytına açıqlamasında yarışa çempionluq hədəfi ilə yollandığını bildirib.
“Çempionata qızıl medal hədəfi ilə yollanmışdım, amma doqquz turdan doqquz qələbə qazanmaq mənim üçün də böyük sevinc oldu. Turnir çox gərgin keçdi, xüsusilə həlledici turlarda güclü rəqiblərlə qarşılaşdım. Hələ son turdan əvvəl çempionluğu təmin etsəm də, sonuncu görüşə də qələbə əzmi ilə çıxdım və seriyanı qırmaq istəmədim”, – Abdinova deyib.
Şahmatçı uğurunda əməyi olan məşqçilərinə və federasiyaya təşəkkür edib. Abdinova doqquzuncu turda FIDE təmsilçisi Lizaveta Liaşkeviçi məğlub edib.
18 yaşlı oğlanların yarışında Tunar Davudov son turda Polşa şahmatçısı Pavel Sovinskini üstələyib. O, xallarını yeddiyə çatdıraraq gümüş medal qazanıb.
8 yaşlı qızların mübarizəsində Selin Məmmədova Türkiyə şahmatçısı Eliz Karahana qalib gəlib və bürünc medal əldə edib.
