Nicat Məmmədov şahmatçıların Avropa çempionatındakı çıxışını dəyərləndirdi

Azərbaycanın yeniyetmələrdən ibarət şahmat millisinin baş məşqçisi Nicat Məmmədov qitə çempionatındakı çıxışı dəyərləndirib. O, Azərbaycan Şahmat Federasiyasının rəsmi saytına açıqlamasında komandanın yarışa ciddi hazırlaşdığını və bunun nəticəsini göstərdiyini deyib.

Məmmədov Nərmin Abdinovanın 18 yaşadək qızların yarışında doqquz oyunun hamısında qələbə qazanmasını xüsusi vurğulayıb. Baş məşqçinin sözlərinə görə, Abdinova turnir boyu rəqiblərinə şans verməyib.

Azərbaycan şahmatçıları üç medal qazandı

Baş məşqçi Tunar Davudov və Selin Məmmədovanın son tura qədər əzmkarlıq göstərərək medal qazandıqlarını bildirib. 42 ölkə arasında ilk beşlikdə yer almağı Azərbaycan şahmat məktəbinin gücünün göstəricisi kimi dəyərləndirib. O, qarşıda dünya birinciliyinin olduğunu və Avropa çempionatındakı uğurun uşaqlar üçün motivasiya olacağını qeyd edib.

Nərmin Abdinova doqquzuncu turda FIDE təmsilçisi Lizaveta Liashkeviçə qalib gəlib və yarışı doqquz xalla başa vurub. 18 yaşlı oğlanların yarışında Tunar Davudov son turda polşalı Pavel Sovinskini məğlub edərək xallarını yeddiyə çatdırıb və gümüş medal qazanıb.

8 yaşlı qızların yarışında Selin Məmmədova türkiyəli Eliz Karahana qalib gələrək bürünc medal əldə edib.