Afət Ziyadqızı
İsrailin Baş naziri Benyamin Netanyahu ABŞ rəsmiləri ilə diplomatik təmaslarını davam etdirir.
“Operativ Məlumat Mərkəzi-OMM” xəbər verir ki, “Axios” portalının jurnalisti Barak Ravidin X sosial şəbəkəsində paylaşdığı məlumata görə, Netanyahu iyulun 29-da ABŞ-nin müdafiə naziri Pit Heqsetlə görüşəcək.
Bildirilib ki, İsrailin baş naziri ardıcıl üçüncü gündür Vaşinqtonda ABŞ rəhbərliyi ilə bir sıra görüşlər keçirir. O, bundan əvvəl ABŞ-nin vitse-prezidenti Cey Di Venslə də danışıqlar aparıb.
Məlumata görə, Benyamin Netanyahu ABŞ Prezidenti Donald Trampla keçirdiyi görüşü yüksək qiymətləndirərək, danışıqların tam tərəfdaşlıq şəraitində baş tutduğunu bildirib.
Qeyd olunub ki, tərəflər arasında əsas müzakirə mövzularından biri İranın nüvə silahına sahib olmasının qarşısının alınması olub. Netanyahu İsrail və ABŞ-nin bu məsələdə ortaq mövqedən çıxış etdiyini vurğulayıb.
