Afət Ziyadqızı
İsrailin Baş naziri Binyamin Netanyahu İranla diplomatik razılaşmanın əldə olunmasına skeptik yanaşdığını bildirib.
“Operativ Məlumat Mərkəzi – OMM” xəbər verir ki, Netanyahu İranın hazırkı rəhbərliyinin beynəlxalq razılaşmalara uzunmüddətli şəkildə əməl edəcəyinə dair ciddi şübhələrin olduğunu vurğulayıb.
İsrail hökumətinin başçısı Tehranın nüvə proqramı ilə bağlı məsələdə etibarlı razılaşmaya gəlməsinin çətin olduğunu bildirib. Bununla yanaşı, Netanyahu ABŞ Prezidenti Donald Tramp administrasiyasının İrana qarşı iqtisadi təzyiqləri gücləndirmək siyasətini dəstəkləyib.
Qeyd edək ki, Vaşinqton son həftələrdə İrana qarşı genişmiqyaslı iqtisadi təzyiq kampaniyasını gücləndirib. ABŞ Maliyyə Nazirliyi yeni sanksiyalarla İranın iqtisadi və ticarət əlaqələrini daha da məhdudlaşdırmağı hədəfləyir.
İsrail və ABŞ liderləri arasında İran məsələsi ilə bağlı yanaşmalarda müəyyən fikir ayrılıqları olsa da, hər iki tərəf Tehranın nüvə silahına sahib olmasının qarşısının alınmasını əsas məqsəd kimi göstərir.
