Afət Ziyadqızı
ABŞ-nin keçmiş dövlət katibi Hillari Klinton İsrailin Baş naziri Binyamin Netanyahu və onun hökumətinin siyasətini tənqid edib.
“Operativ Məlumat Mərkəzi-OMM” xəbər verir ki, Klinton MS NOW kanalında yayımlanan proqramda iştirak edərkən Netanyahu hökumətinə münasibətini açıqlayıb.
“Mən İsraili sevirəm ancaq Netanyahu hökumətinə və onun siyasətinə nifrət edirəm. Mən Amerikanı sevirəm, Tramp hökumətinə və onun siyasətinə nifrət edirəm”, – deyə Klinton bildirib.
Birləşmiş Ərəb Əmirliklərinin (BƏƏ) Prezidenti Məhəmməd bin Zayed Al Nəhyanın 7 oktyabr 2023-cü il hadisələrindən əvvəl Netanyahunu Qəzza zolağından mümkün hücumla bağlı xəbərdar etdiyi barədə xəbərlərə də toxunan Klinton bunun liderlik uğursuzluğu olduğunu bildirib.
“Onun (Netanyahunun) nə düşündüyünü bilmirəm, amma bu, liderlik uğursuzluğu idi”, – deyə o qeyd edib.
Klinton İsrail cəmiyyətinin Netanyahuya yenidən səs verməsi halında ABŞ-nin daha sərt mövqe sərgiləməli olduğunu vurğulayıb.
“Əgər israillilər yenidən ona (Netanyahuya) səs vermək istəyirlərsə, o zaman məncə, ABŞ çox sərt mövqe tutmalıdır”, – deyə Klinton bildirib.
Klinton işğal altındakı Qərb Şəriyada israilli məskunlaşanların fələstinlilərə qarşı zorakılığı məsələsinə də toxunub.
O, yeni baş nazirin Qərb Şəriyada məskunlaşanların zorakılığına qarşı sərt tədbirlər görməsini arzuladığını bildirib.
“Ümid edirəm ki, yeni baş nazir (işğal altındakı) Qərb Şəriyada məskunlaşanların zorakılığına qarşı sərt tədbirlər görəcək”, – deyə Klinton qeyd edib.
ABŞ-nin keçmiş dövlət katibi bu cür zorakılıqlara görə cəzasızlığın yolverilməz olduğunu da vurğulayıb.
“Bu, fələstinlilər üçün ədalətsiz, pis və yanlışdır”, – deyə Klinton əlavə edib.
