İsrail Baş naziri Benyamin Netanyahu İranın yaratdığı təhdidlərin qarşısının alındığını və Tehran rəhbərliyinin hazırda tarixdəki ən zəif vəziyyətində olduğunu bildirib.
“Operativ Məlumat Mərkəzi-OMM” xəbər verir ki, Netanyahu bu barədə Tel-Əvivdəki “Kirya” Müdafiə Nazirliyi kompleksində keçirilən iclasda danışıb.
Məlumata görə, görüşdə müdafiə naziri Yisrael Katz, Baş Qərargah rəisi Eyal Zamir və digər yüksək rütbəli komandirlər iştirak ediblər. Netanyahu İran rejiminin devrilməsini qarşılarında duran əsas hədəf kimi göstərib.
Baş nazir bu məqsədə çatmaq üçün İsrailin kifayət qədər imkanlara malik olduğunu və rejim dəyişikliyinin mümkün olduğunu iddia edib. O, İsrailin cavab tədbirlərindən sonra İranın hücumlar həyata keçirməkdən çəkindiyini və ölkə daxilində birliyin təmin olunduğunu bildirib.
