OMM Redaksiyası
“Neftçi”nin baş icraçı direktoru Cenk Sümer komandanın bu mövsüm çempionluq və kuboklar uğrunda mübarizə aparacağını bildirib. Onun sözlərinə görə, klub gələcəkdə Avropa turnirlərinin qrup mərhələsində oynamağı və bunu davamlı nəticəyə çevirməyi planlaşdırır.
Bu il 90 illik yubileyini qeyd edən “Neftçi”nin uğurlu nəticələrə kökləndiyini deyən Sümer bildirib ki, klubun hər mövsüm məqsədi kuboklar qazanmaqdır. O, heyətin dəyişdiyini, komandanın səviyyəsinin yüksəldiyini və çempionatın ötən illərlə müqayisədə daha rəqabətli olduğunu vurğulayıb. Doqquz turdan sonra turnir cədvəlinin yuxarı pillələrində vahid liderin olmadığını, “Sabah” və “Qarabağ”ın da mübarizəni davam etdirdiyini qeyd edib.
Sümerin sözlərinə görə, klubda iki ildən artıqdır yenidənqurma prosesi gedir və rəhbərlik görülən işlərin, yatırılan investisiyaların nəticəsini görmək istəyir. Baş məşqçi, komanda, texniki heyət və rəhbərlik eyni məqsəd uğrunda çalışır. O, bu fikirləri AZƏRTAC-a açıqlamasında səsləndirib.
Qış transfer pəncərəsinə toxunan Sümer klubun planlarının olduğunu, lakin hələ yekun qərar verilmədiyini bildirib. “Neftçi” ötən qış Brenonu, bu yay isə 10 futbolçunu transfer edib. Onlardan doqquzu yeni oyunçu olub, Varqasın icarə müqaviləsi isə satınalma ilə əvəzlənib. Klub baş məşqçinin hesabatı və öz planları əsasında namizədləri nəzərdən keçirir, skaut departamenti futbolçuları canlı izləyir. Buna görə qışda yeni transferlər mümkündür.
“Neftçi” Premyer Liqanın turnir cədvəlində 18 xalla ikinci pillədə qərarlaşıb.
