Afət Ziyadqızı
Ermənistan Respublikasının xarici işlər naziri Ararat Mirzoyan ölkəsinin Kollektiv Təhlükəsizlik Müqaviləsi Təşkilatındakı (KTMT) iştirakını və fəaliyyətini çoxdan dayandırdığını, eləcə də qurumdakı üzvlüyünü faktiki olaraq dondurduğunu bəyan edib.
"Operativ Məlumat Mərkəzi-OMM" xəbər verir ki, Mirzoyan bu barədə İrəvanda sloveniyalı həmkarı ilə birgə keçirdiyi brifinqdə KTMT-nin keçmiş baş katibi Nikolay Bordyujanın Ermənistanın təşkilatdan tamamilə çıxarılmasının zəruriliyi barədə səsləndirdiyi fikirləri şərh edərkən danışıb.
Ararat Mirzoyan İrəvanın mövqeyini qəti şəkildə ifadə edərək bildirib: “Ermənistan KTMT-dəki iştirakını çoxdan dayandırıb və üzvlüyünü dondurub. Biz bu təşkilata geri qayıtmaq və mövcud münasibətlərimizi dəyişmək üçün heç bir real imkan və ya perspektiv görmürük”.
Xatırladaq ki, KTMT-nin keçmiş baş katibi Nikolay Bordyuja “RIA Novosti” agentliyinə müsahibəsində Ermənistanın iştirakını dondurmasına baxmayaraq, hüquqi baxımdan hələ də təşkilatın tamhüquqlu üzvü olaraq qaldığını bildirmişdi. O, qurumda bütün qərarların konsensus prinsipi ilə qəbul edildiyini xatırladaraq, İrəvanın hazırkı mövqeyinin təşkilatın ümumi fəaliyyəti və maraqları ilə kəskin ziddiyyət təşkil etdiyini vurğulamışdı.
Ermənistan rəhbərliyi 2024-cü ildə KTMT-dəki fəaliyyətini dondurduğunu və təşkilatın büdcəsinə üzvlük haqlarını ödəməyi dayandırdığını rəsmən elan etmişdi. Lakin hərbi blokun nizamnaməsində üzvlüyün birtərəfli qaydada dondurulması mexanizmi hüquqi olaraq nəzərdə tutulmadığından, İrəvan rəsmi şəkildə Rusiya, Belarus, Qazaxıstan, Qırğızıstan və Tacikistanla yanaşı hələ də təşkilatın üzvü olaraq qalmaqdadır.
Siyasi ekspertlər Ermənistanın bu addımlarını Qərb ölkələri ilə inteqrasiya xəttinin gücləndirilməsi və postsovet təhlükəsizlik mexanizmlərindən uzaqlaşmaq siyasətinin davamı kimi qiymətləndirirlər.
