OMM Redaksiyası
Azərbaycan Premyer Liqasının VIII turunda “Qarabağ” və “Neftçi” arasında keçiriləcək qarşılaşmada hər iki komandanın hücum futbolu nümayiş etdirəcəyi gözlənilir. Futbol mütəxəssisi Elmar Baxşıyev derbi öncəsi tərəflərin şanslarının bərabər olduğunu bildirib.
Baxşıyevin sözlərinə görə, komandalar bu oyuna yüksək motivasiya ilə çıxacaqlar. O qeyd edib ki, son illərdə Azərbaycan derbisində iştirakçılar turnir cədvəlində fərqli mövqelərdə olublar, hazırkı qarşılaşmanın özəlliyi isə hər iki kollektivin eyni xala malik olması və turnir cədvəlinin zirvəsində qərarlaşmasıdır.
Futbol mütəxəssisi bildirib ki, qələbə qazanan tərəf psixoloji üstünlük əldə edəcək. Onun fikrincə, oyuna daha yüksək motivasiya ilə çıxan komanda üstünlük qazana bilər. Baxşıyev qarşılaşmada hər iki kollektivin hücum futboluna üstünlük verəcəyini gözlədiyini söyləyib.
“Qarabağ” – “Neftçi” matçı Tofiq Bəhramov adına Respublika stadionunda keçiriləcək və saat 19:00-da başlayacaq.
