OMM Redaksiyası
Azərbaycanlı UFC döyüşçüsü Nazim Sadıxov noyabrın 28-də ABŞ-ın Nyu-York şəhərində təşkil olunacaq “THE KAGE: Chapter 01” MMA şousunda iştirak edəcək. O, tədbirə xüsusi qonaq kimi dəvət olunub.
Sadıxov bu dəfə oktaqona döyüşmək üçün çıxmayacaq. O, qarşılaşmaları şərh edəcək, həmçinin titul döyüşlərindən birinin qalibinə çempionluq kəmərini şəxsən təqdim edəcək.
Tədbir tarixi “Bowery Savings Bank” binasında yerləşən “Capitale” kompleksində keçiriləcək. Təşkilatçıların sözlərinə görə, Sadıxov UFC-də peşəkar karyerasına başlamazdan əvvəl də bu məkanda döyüşüb. İdmançı həmin arenaya bu dəfə UFC döyüşçüsü statusunda qayıdacaq.
Şounun proqramında qarışıq döyüş növləri üzrə qarşılaşmalarla yanaşı, musiqi çıxışları da yer alacaq. Tədbirə yalnız 21 yaşdan yuxarı şəxslər buraxılacaq.
29 yaşlı Sadıxov UFC-nin yüngül çəki dərəcəsində mübarizə aparır. Onun peşəkar MMA karyerasında 11 qələbə, üç məğlubiyyət və bir heç-heçə var.
