OMM Redaksiyası
“Real Madrid”in yarımmüdafiəçisi Orelyen Tçuameni komanda yoldaşı Federiko Valverde ilə mayda yaşanan münaqişə barədə yenidən danışıb. Fransalı futbolçu aralarında dava olmadığını bildirib, lakin paltardəyişmə otağında xoşagəlməz hadisənin baş verdiyini etiraf edib.
“İnsanlar bu barədə çox danışır, amma Valverde ilə aramızda dava olmayıb. Paltardəyişmə otağında müxtəlif şeylər baş verir, söz atışmaları da olur, ancaq mən onunla heç vaxt dalaşmamışam. Doğrudur, xoşagəlməz bir hadisə baş verdi”, – Tçuameni “The Bridge” verilişində deyib.
Hadisə mayda, məşqlərdə bir neçə gərgin epizoddan sonra baş verib. Toqquşma zamanı Valverde başından zədə alıb. “Real Madrid” hər iki futbolçunu 500 min avro cərimələyib.
Tçuameni hadisənin hər iki oyunçunun Madrid klubunda çıxış etməsi səbəbindən böyük rezonans doğurduğunu qeyd edib. Onun sözlərinə görə, baş verənlərə görə narahat olan çoxsaylı tanışları ona zəng edib və futbolçu onları sakitləşdirməli olub.
“Bu gün paltardəyişmə otağına gəlsəniz, Valverde ilə münasibətlərimizin yaxşı olduğunu və aramızda heç bir problemin olmadığını görərsiniz”, – yarımmüdafiəçi əlavə edib.
