Azərbaycan cüdoçularının Avropa Çempionlar Liqasındakı rəqibləri bəlli olub

Cüdo üzrə Avropa Çempionlar Liqasının püşkatması keçirilib. Oktyabrın 25-də Parisdə təşkil olunacaq yarışda iştirak edəcək Azərbaycan idmançılarının ilk rəqibləri müəyyənləşib.

Azərbaycanın “Cüdo 2012” klubu səkkizdəbir finalda Fransanın “Cüdo Nitsa Metropol” komandası ilə qarşılaşacaq. Klubun heyətində İbrahim Əliyev (73 kq), Elcan Hacıyev (90 kq), Sübhan Axundov (+90 kq), Ülviyyə Bayramova (57 kq), Aytac Qardaşxanlı (70 kq) və Diana Semçenko (+70 kq) yer alıb.

Olimpiya çempionları Hidayət Heydərov (73 kq) və Zelim Kotsoyev (+90 kq) Serbiyanın “Srvena Zvezda” klubunda çıxış edəcəklər. Belqrad təmsilçisi ilk mərhələdən azad olunub və yarışa dörddəbir finaldan qoşulacaq.

Zelim Tskayev (90 kq) və Uşanqi Kokauri (+90 kq) Fransanın PSJ klubunu təmsil edəcəklər. Paris komandası da mübarizəyə dörddəbir final mərhələsindən başlayacaq.

Rəşid Məmmədəliyev (73 kq) və Murad Fətiyev (90 kq) Rusiyanın “Cüdo Klub Konar” komandasının heyətində yer alıblar. Klub səkkizdəbir finalda Fransanın “AM Sen-Qratyen” komandası ilə üz-üzə gələcək.

Azərbaycan cüdoçuları Avropanın əsas klub turnirində müxtəlif komandaların heyətində medallar uğrunda mübarizə aparacaqlar.