OMM Redaksiyası
Azərbaycanlı UFC döyüşçüsü Nazim Sadıxov noyabrın 14-də Nyu-Yorkda keçiriləcək “UFC 334” turnirində oktaqona çıxmayacaq. O, “Medison Skver Qarden” arenasında braziliyalı Cefferson Nasimento ilə qarşılaşmalı idi.
Sadıxov bildirib ki, təlim-məşq toplanışının əvvəlində zədə alıb və beş həftədən çoxdur onun fəsadları ilə mübarizə aparır. Əvvəlcə zədəyə baxmayaraq döyüşə çıxmağı planlaşdıran idmançının rəqibi də zədə səbəbindən turnirdə iştirakdan imtina edib.
“Komandamla birlikdə UFC-yə məlumat vermək qərarına gəldik ki, mənə əvəzləyici axtarmasınlar”, – Sadıxov bildirib. O əlavə edib ki, əməliyyata ehtiyacı olmayacaq və uzunmüddətli bərpa prosesi keçirməyəcək. Döyüşçü zədənin öhdəsindən gəlib mümkün qədər tez sıraya qayıtmağı planlaşdırır.
Sadıxov sonuncu dəfə iyunda Bakıda keçirilən UFC turnirində döyüşüb. O, braziliyalı Mateus Kamiloya birinci raundun 1-ci dəqiqə 31-ci saniyəsində texniki nokautla uduzub.
Sadıxovun peşəkar karyerasında 11 qələbə, üç məğlubiyyət və bir heç-heçə var. UFC-də onun göstəricisi dörd qələbə, iki məğlubiyyət və bir heç-heçədir.
