OMM Redaksiyası
Azərbaycanlı MMA döyüşçüsü Nərmin Əliyeva peşəkar karyerasında UFC-yə yüksəlməyi qarşısına əsas hədəflərdən biri qoyub. O, həvəskar karyerasında IMMAF və GAMMA təşkilatlarının Avropa və dünya çempionu olduğunu, bu nəticələrin ona əlavə motivasiya verdiyini bildirib.
Əliyeva İsveçdə keçirilən “Fight Club Rush” turnirində yerli idmançı Mari Paulseni ilk raundda təslim olmağa məcbur edərək peşəkar karyerasında ikinci qələbəsini qazanıb. Döyüşçü qarşılaşmaya ilk raundda qələbə planı ilə hazırlaşdığını və bunu reallaşdıra bildiyini deyib.
Onun sözlərinə görə, hazırda əsas diqqəti ilin sonunda qatılacağı iki dünya çempionatına yönəlib. Əliyeva həmin yarışlarda çempion olmağı, daha sonra peşəkar döyüşlərini davam etdirərək mümkün qədər tez UFC-yə yüksəlməyi planlaşdırır.
Qadın MMA-sına dəstək çağırışı
Əliyeva Azərbaycanda qadın MMA döyüşçülərinə münasibətin hər zaman müsbət olmadığını, bəzi insanların döyüş idmanlarını yalnız kişilərə uyğun hesab etdiyini vurğulayıb. O, qızların bu idmana marağını artırmaq üçün onlara daha çox imkan, inam və dəstək göstərilməsinin vacibliyini qeyd edib.
Döyüşçü bildirib ki, öz uğurlarını yalnız şəxsi nəticə kimi görmür, həm də ondan sonra bu idmana gələcək azərbaycanlı qızlar üçün yol açmaq istəyir. Əliyeva karyerasını davam etdirmək üçün sponsor tapmaqda çətinlik çəkdiyini də söyləyib.
