OMM Redaksiyası
Braziliyalı döyüşçü İsmael Bonfim artıq UFC-də çıxış etmir. Onun təşkilatdakı karyerası bir neçə gün əvvəl argentinalı Fransisko Pradoya ilk raundda texniki nokautla məğlubiyyətindən sonra başa çatıb.
Bonfim həmin döyüşdən əvvəl çəki limitini üç kiloqramdan çox keçib. O, UFC-də çıxış etdiyi müddətdə iki dəfə çəkiölçmədən uğurla keçə bilməyib. Çəki salmaqla bağlı problemlərə görə onun iştirakı ilə planlaşdırılan daha bir qarşılaşma da ləğv olunub.
UFC-dəki çıxışları
30 yaşlı idmançı təşkilatda debütünü 2023-cü ilin yanvarında edib və Terrens MakKinnini ikinci raundda nokautla məğlub edib. Bonfim sonrakı altı döyüşünün beşində vaxtından əvvəl uduzub.
Azərbaycanlı Nazim Sadıxov ötən il Las-Veqasda keçirilən UFC Fight Night 251 turnirində Bonfimə qalib gəlib. Bu qələbə ilin yaddaqalan hadisələrindən biri kimi qiymətləndirilib.
Bonfim UFC-yə vəsiqəni isə digər azərbaycanlı döyüşçü Nəriman Abbasov üzərində qazandığı qələbə ilə əldə edib. Onların görüşü 2022-ci il sentyabrın 6-da Las-Veqasın UFC Apex arenasında Dana Uaytın İddiaçılar Seriyasının altıncı mövsümünün yeddinci buraxılışında baş tutub. Braziliyalı döyüşçü hakimlərin yekdil qərarı ilə — 30:27, 30:27, 29:28 — qalib gəlib və UFC ilə müqavilə imzalamaq hüququ qazanıb.
