Mezzotero “Sampdoriya”nın zal məşqlərinə qoşulub

“Sampdoriya”nın hücumçusu Lorenzo Mezzoteronun zədədən sonra bərpa prosesində irəliləyiş var. Azərbaycan millisinin UEFA Millətlər Liqasında Lixtenşteynlə oyununu buraxacaq 18 yaşlı futbolçunun ayağının üst hissəsində zərbə nəticəsində yaranan hematoma tədricən çəkilir.

Mezzotero dünən səhər müalicə prosedurlarından keçib, günortadan sonra isə komandanın zalda güc məşqləri edən qruplarından birinə qoşulub.

İtaliya B Seriyasında çıxış edən hücumçu “Karrareze” ilə çempionat matçında zədələnib. Bu səbəbdən onun Azərbaycan millisində debütü təxirə düşüb.

Ayxan Abbasovun əsas yığmaya ilk dəfə dəvət etdiyi Mezzoteronun əvəzinə “Araz-Naxçıvan”ın hücumçusu Ağadadaş Salyanski milliyə çağırılıb.

Kontekst

Noyabrın 9-da Mezzotero zədə səbəbindən Azərbaycan millisinin heyətindən çıxarılıb və onun yerinə Ağadadaş Salyanski dəvət alıb. Azərbaycan millisi noyabrın 13-də UEFA Millətlər Liqasında səfərdə Lixtenşteynlə qarşılaşacaq.