Amerikalı sahibkar və "X" sosial şəbəkəsinin sahibi İlon Mask Polşanın xarici işlər naziri Radoslav Sikorski haqqında təhqiramiz ifadələr işlədib.
"Operativ Məlumat Mərkəzi-OMM" xəbər verir ki, Mask polşalı diplomatı Rusiya və "Starlink" peyk internet sistemi barədə dediyi sözlərə görə "ağzı köpüklənmiş axmaq" adlandırıb.
Milyarder öz şəxsi hesabında paylaşdığı şərhdə nazirin texnologiyanın əhəmiyyətini anlamadığını vurğulayıb:
“Bu ağzı köpüklənmiş axmaq hətta ”Starlink" sisteminin Ukraynanın hərbi rabitəsinin əsasını təşkil etdiyini belə başa düşmür", - deyə Mask qeyd edib.
Məlumata görə, bu reaksiya Sikorskinin Rusiyanın Ukraynaya zərbələr endirmək üçün "Starlink"dən istifadə etməsinin qarşısının alınması ilə bağlı çağırışından sonra gəlib.
Xatırladaq ki, daha əvvəl Polşa XİN rəhbəri Maskı Rusiyaya kömək etməkdə və "hərbi cinayətlərdə" ittiham etmişdi.
