OMM Redaksiyası
ABŞ-da aralıq seçkilərə bir həftə qalmış Federal Seçki Komissiyasının (FEC) elektron hesabat sistemi hakerlərin hədəfinə çevrilib. “AnewZ”in “Reuters”in gördüyü elektron məktuba istinadən verdiyi məlumata görə, bu, “super PAC” komitələrinin və qeyri-şəffaf maliyyələşən qrupların seçki kampaniyasının son günlərində rekord həcmdə vəsait xərclədiyi vaxt baş verib.
FEC sistemin bazar ertəsi yerli vaxtla saat 22:00-dan işləmədiyi barədə status məlumatı yayıb. Komissiyanın açıqlamasında bildirilib ki, informasiya texnologiyaları əməkdaşları xidmətin bərpası üzərində çalışırlar.
FEC-in elektron hesabatlar üzrə əməkdaşı həmin axşam seçki kampaniyalarının maliyyə hesabatlarına nəzarət edən bir neçə şirkətə göndərdiyi məktubda sistemə müdaxilə cəhdi olduğunu və buna görə internetə açıq xidmətlərin müvəqqəti dayandırıldığını yazıb.
Çərşənbə axşamı yerli vaxtla saat 20:00-da yayımlanan yeni status məlumatında problemin müəyyən edildiyi və həll olunduğu bildirilib.
Sistem seçicilərin səsverməsinə təsir etmir
FEC-in elektron hesabat sisteminin fəaliyyətindəki fasilə ABŞ seçkilərinə və seçicilərin səs vermək imkanına təsir göstərmir. Sistem namizədlərin və siyasi komitələrin xərclərini izləmək üçün istifadə olunur.
Fasilə təşkilatların FEC-ə 24 və 48 saat ərzində təqdim etməli olduqları xərc hesabatlarını göndərməsinə mane olur. Bu hesabatlarda siyasi qrupların və digər təşkilatların konkret seçki yarışlarına nə qədər vəsait xərclədiyi göstərilir.
Seçki kampaniyalarının maliyyələşməsinə nəzarət edən qeyri-partiyalı “OpenSecrets” təşkilatının tədqiqat direktoru Brendan Qlavin bildirib ki, bu hesabatlar xərcləmələrin gedişini izləmək üçün əsas mənbələrdəndir. Onun sözlərinə görə, seçkilərə qalan son günlərdə vəsaitin hara və kim tərəfindən xərcləndiyini izləməyin yeganə yolu həmin hesabatlardır.
Seçki reklamlarına 11,21 milyard dollar xərclənib
Siyasi reklam xərclərini izləyən “AdImpact” şirkətinin məlumatına görə, ABŞ-da keçiriləcək aralıq seçkilər ölkə tarixinin ən bahalı seçkilərinə çevrilib. İndiyədək siyasi reklamlara və gələcək reklam sifarişlərinə təxminən 11,21 milyard dollar xərclənib.
“AdImpact” bildirib ki, bu məbləğ 2024-cü il seçkilərində qeydə alınmış əvvəlki rekordu ötüb. Həmin seçkilərdə bütün yarışlar üzrə 11,2 milyard dollar, o cümlədən Donald Tramp və keçmiş vitse-prezident Kamala Harris arasındakı prezidentlik yarışı üçün 3,2 milyard dollar xərclənmişdi.
Xərclərin böyük hissəsini “super PAC”lar həyata keçirib. Bu komitələr varlı şəxslərdən və şirkətlərdən məhdudiyyətsiz ianələr qəbul edə, müəyyən məhdudiyyətlər çərçivəsində siyasi kampaniyalara böyük məbləğlər xərcləyə bilirlər.
Brendan Qlavinin sözlərinə görə, “super PAC”lar və qeyri-şəffaf maliyyələşən qruplar son bir həftə ərzində gündə orta hesabla 50 milyon dollardan çox vəsait xərcləyiblər. O əlavə edib ki, təkcə oktyabrın 20-də 250 milyon dollardan artıq xərc barədə məlumat verilib.
