Afət Ziyadqızı
İtaliyanın Palermo şəhərinin baş prokuroru Mauritsio de Luçiya ölkədə fəaliyyət göstərən mafiya qruplaşmalarının Ukraynada istifadə olunan pilotsuz uçuş aparatlarını (PUA) qara bazar vasitəsilə əldə etməyə çalışdıqlarını açıqlayıb.
“Operativ Məlumat Mərkəzi-OMM” xəbər verir ki, prokurorun sözlərinə görə, hüquq-mühafizə orqanları artıq Balkan marşrutu vasitəsilə İtaliyaya daxil olan bəzi silah növlərini aşkar ediblər.
Bildirilib ki, münaqişə dövründə qara bazara çıxan müasir silah sistemlərinə cinayətkar qruplaşmaların artan marağı təhlükəsizlik orqanlarında ciddi narahatlıq yaradıb.
Məsələ ilə bağlı açıqlama verən Rusiya Xarici İşlər Nazirliyinin rəsmi nümayəndəsi Mariya Zaxarova "Sputnik" radiosuna müsahibəsində Rusiyanın bu risk barədə Avropa ölkələrini və Brüsseli dəfələrlə xəbərdar etdiyini bildirib.
Onun sözlərinə görə, Moskva əvvəldən Kiyev hakimiyyətinin hərəkətlərinin nəzarətdən çıxa biləcəyi barədə xəbərdarlıq edib. Zaxarova iddia edib ki, hazırda müşahidə olunan hadisələr Qərbin Ukraynaya göstərdiyi hərbi dəstəyin gözlənilməz və təhlükəli nəticələrini nümayiş etdirir.
