Polşa Ukraynaya “MiQ-29” qırıcı təyyarələrinin təhvil verilməsi ilə bağlı qərarını dəyişib.
"Operativ Məlumat Mərkəzi-OMM" xəbər verir ki, bu barədə Polşanın müdafiə naziri Vladislav Kosinyak-Kamış açıqlama verib. Nazir bildirib ki, rəsmi Varşava Kiyevin pilotsuz uçuş aparatları (PUA) texnologiyalarının tədarükü ilə bağlı öhdəliklərdən imtina etməsi səbəbindən “MiQ-29”ların ötürülməsini dayandırıb.
Məlumata görə, Polşa tərəfi əvvəlcə Ukrayna ilə qarşılıqlı faydalı əməkdaşlıq çərçivəsində təyyarələrin dron texnologiyaları ilə dəyişdirilməsini təklif edib. Ukrayna tərəfinin bu təklifi ilkin mərhələdə müsbət qarşıladığı, lakin daha sonra mövqeyini dəyişərək razılaşmadan imtina etdiyi bildirilir.
Nazir Kosinyak-Kamış qeyd edib ki, götürülən öhdəliklərin yerinə yetirilməməsi səbəbindən Polşa Ukraynaya planlaşdırılan hərbi yardımın bu hissəsini dayandırmaq qərarına gəlib.
Bildirilib ki, bu addım Polşa ilə Ukrayna arasında son dövrlərdə müşahidə olunan siyasi gərginlik fonunda baş verir.
Xatırladaq ki, daha əvvəl Avropa Parlamentinin polşalı deputatı Yeva Zayonçkovskaya-Gernik Ukrayna prezidenti Volodimir Zelenskiyə qarşı ictimai mövqelərin sərtləşdirilməsi çağırışı etmişdi. Deputat bu mövqeyini Ukrayna Üsyançı Ordusunun (UPA) tarixi ilə bağlı mübahisələr və Polşada daxili siyasi gərginliklə əsaslandırmışdı.
