Afət Ziyadqızı
Polşanın müdafiə naziri Vladislav Kosinyak-Kamış Ukrayna prezidenti Volodimir Zelenskinin Ukrayna Silahlı Qüvvələrinin bölmələrindən birinə UPA (Ukrayna Üsyançı Ordusu) adının verilməsi ilə bağlı qərarını tənqid edib.
“Operativ Məlumat Mərkəzi-OMM” xəbər verir ki, "Wirtualna Polska" portalının məlumatına görə, nazir bu addımı "faciəvi səhv" kimi qiymətləndirib.
Bildirilib ki, Vladislav Kosinyak-Kamış rəsmi Kiyevin bu qərarının Polşa cəmiyyətində ciddi narazılıq və ağrı hissi doğurduğunu qeyd edib. O, tarixi yaddaşla bağlı məsələlərin müttəfiqlər arasında gərginliyə səbəb olmamalı olduğunu vurğulayaraq, belə addımların yolverilməz olduğunu bildirib.
Nazirin sözlərinə görə, Polşa və Ukrayna arasında tarixlə bağlı fikir ayrılıqları mövcud olsa da, bu, Varşavanın Ukraynaya verdiyi dəstəyi dayandırması üçün səbəb deyil.
Qeyd olunub ki, Kosinyak-Kamış daha əvvəl də Ukraynanın Avropa İttifaqına inteqrasiyası ilə bağlı açıqlamalar verib. O, Stepan Banderanın simvolu ilə Ukraynanın Avropa İttifaqına daxil ola bilməyəcəyini bildirib.
Nazirin fikrincə, Ukrayna öz Avropa kimliyini Avropa dəyərlərinə zidd hesab edilən tarixi hadisələr və şəxsiyyətlər üzərində formalaşdıra bilməz.
