OMM Redaksiyası
Yaponiya Futbol Assosiasiyasının (JFA) fəxri prezidenti Kozo Tashima Beynəlxalq Futbol Federasiyasının (FİFA) prezidentliyinə namizədliyini irəli sürmək qərarını açıqlayıb. Britaniyalı jurnalist və insayder Ben Ceykobs bu barədə sosial şəbəkələrdə məlumat yayıb.
Tashima seçkidə Yaponiya Futbol Assosiasiyasının tam dəstəyi ilə iştirak edəcəyini bildirib. O, dünya futbolunun idarəçilik prinsiplərində islahat aparmağı hədəflədiyini vurğulayıb.
“Bu açıqlamanı Yaponiya Futbol Assosiasiyasının tam dəstəyi ilə etmək imkanına görə səmimi qəlbdən minnətdaram. Məsələ qələbə və ya məğlubiyyətdə deyil. Əsas məqsəd Yaponiya futbolunun uzun illər ərzində formalaşdırdığı dürüstlük, şəffaflıq və prinsipiallıq barədə dünyaya açıq danışmaqdır.
İnanıram ki, hazırda FİFA-nın məhz bu əsas dəyərlərə ehtiyacı var. Bütün dünyaya bu mesajı çatdırmaq üçün FİFA prezidenti postuna namizədliyimi irəli sürmək barədə qəti qərar vermişəm”, – Tashima deyib.
