Afət Ziyadqızı
Polşanın müdafiə naziri Vladislav Kosinyak-Kamış ölkə prezidenti Karol Navroçkinin Ukraynaya "Patriot" hava hücumundan müdafiə sistemləri üçün raketlərin tədarükü ilə bağlı məlumatsız olması barədə açıqlamalarını təkzib edib.
“Operativ Məlumat Mərkəzi-OMM” xəbər verir ki, nazir "Wirtualna Polska" nəşrinə müsahibəsində dövlət başçısının bu prosesdən tam xəbərdar olduğunu bildirib.
Bildirilib ki, Kosinyak-Kamış prezidentlə bu məsələ barədə şəxsən danışdığını və NATO-nun Baş katibi Mark Ruttenin də bu mövzuda onunla müzakirələr apardığını qeyd edib.
"Prezident, şübhəsiz ki, bu barədə məlumatlı idi. Lakin hazırda vəziyyəti tamamilə fərqli şəkildə təqdim edir", - deyə Polşa müdafiə naziri bildirib.
Nazir vurğulayıb ki, Varşavanın hərbi yardımlarla bağlı qərarları şəffaf şəkildə qəbul edilir. Onun sözlərinə görə, prezident nümayəndələri Təhlükəsizlik Komitəsinin bütün iclaslarında iştirak edir və Ukraynaya hərbi tədarüklərlə bağlı qərarlar məhz həmin toplantılarda müzakirə olunur.
Kosinyak-Kamış əlavə edib ki, dövlət başçısının bu məsələlərlə bağlı "yanlış məlumat yaymasına" və ya "siyasi şoular" təşkil etməsinə imkan verməyəcək.
Qeyd edək ki, bundan əvvəl Polşa Prezidenti Ankara sammitində Kiyevlə fikir ayrılıqlarını həll edə bilmədiyini və Varşavanın Ukrayna Üsyançı Ordusu (UPA) ilə bağlı mövqeyini Ukrayna prezidenti Volodimir Zelenskiyə şəxsən çatdırdığını açıqlamışdı.
