OMM Redaksiyası
“PSJ”nin baş məşqçisi Luis Enrike Liqa 1-in 9-cu turunda “Havr”la keçirilən oyunda Aşraf Hakiminin performansını dəyərləndirib. Mərakeşli futbolçu qarşılaşmada het-trik edib və iki məhsuldar ötürmə verib.
Enrike Hakiminin komandanın kapitanı olduğunu və onun güclü tərəflərinin yaxşı tanındığını bildirib. Məşqçinin sözlərinə görə, futbolçu hücumçuya daha çox bənzəyir: irəli mövqedə oynayır, sürətli reydlər edir və həlledici ötürmələr verə bilir.
“Top bizdə olanda o, açıq şəkildə hücumameyilli oyunçu kimi çıxış edir. Top bizdə olmayanda isə hamı müdafiəçiyə çevrilir. O, dünyanın ən yaxşı sağ cinah müdafiəçisidir, amma üç qol vurmasına o qədər də heyran deyiləm. Mənim üçün daha vacib olan onun daim ən yüksək səviyyədə çıxış etməsi və oyuna həmişə hazır olmasıdır. Bu, komandamız üçün çox böyük əhəmiyyət daşıyır”, – Enrike L’Équipe-ə açıqlamasında deyib.
