OMM Redaksiyası
Almaniyanın sabiq futbolçusu Lotar Matteus “Borussiya”nın “Sabah”la Çempionlar Liqası matçından sonra Bakı Olimpiya Stadionunun duş otaqlarından istifadə etməməsi barədə danışıb. O, “Bild” nəşrinin “Lothar legt los” proqramında stadionun infrastrukturu ilə bağlı mənfi qiymətləndirmələrlə razılaşmayıb.
Bu yaxınlarda Azərbaycanda olduğunu deyən 65 yaşlı Matteus şəraitdən razı qaldığını bildirib: “Ümumilikdə hər şey müasirdir. Duşlar da işləyir. Hesab edirəm ki, orada təkcə soyuq su olmayıb. Mənim fikrimcə, hər şey kifayət qədər normal vəziyyətdədir”.
Otelə qayıtmağın mümkün səbəbləri
Matteusun ehtimalına görə, “Borussiya”nın futbolçuları otelə daha tez çatmaq, otaqlarında rahatlanmaq və hazırlaşmaq istəyiblər. Qarşıda şam yeməyi olduğunu və saat fərqini də nəzərə almağın vacibliyini qeyd edib. O, qərarın futbolçuların bərpası və növbəti oyuna hazırlığı üçün qəbul edilmiş ola biləcəyini söyləyib. Zarafatla komandanın saç düzəltməyə çox vaxt sərf edən futbolçunu gözləmək üçün əlavə 15 dəqiqədən yayınmış ola biləcəyini də deyib.
Dünya çempionu qərarın özündə problem görmədiyini, ancaq klubun bunu izah edə biləcəyini vurğulayıb. “O zaman indi heç bir söz-söhbət də yaranmazdı”, – deyə Matteus bildirib.
“Borussiya”nın açıqlamaları
“Sabah” üzərində 2:1 hesablı qələbədən sonra almaniyalı futbolçular stadionda duş qəbul etmədən avtobusa minib. Baş məşqçi Niko Kovaç futbolçulara əvvəlcədən oteldə duş qəbul etməyin tövsiyə olunduğunu deyib. İdman direktoru Ole Buk isə oteldəki duş otaqlarını daha cəlbedici adlandırıb, stadiondakılar barədə “o qədər də dəbdəbəli görünmədiyini” söyləyib.
Bu açıqlamalar Almaniya mətbuatında müzakirə olunub. “Sabah”ın futbolçusu Coy-Lens Mikels isə Azərbaycan komandasının oyunçularının həmin duş otaqlarından istifadə etdiyini və problemlə üzləşmədiyini bildirib.
