Afət Ziyadqızı
Birləşmiş Ştatlar Səudiyyə Ərəbistanı Krallığında fəaliyyət göstərən fövqəladə vəziyyətlə bağlı olmayan diplomatik heyətinə və onların ailə üzvlərinə artan təhlükəsizlik riskləri səbəbindən ölkəni dərhal tərk etmək barədə rəsmi göstəriş verib.
"Operativ Məlumat Mərkəzi-OMM" xəbər verir ki, Vaşinqtonun bu təxliyə qərarına əsas səbəb kimi Yəməndəki husi qruplaşmasının Səudiyyə Ərəbistanı ərazisinə və regional obyektlərə qarşı kəskinləşən təhdidləri göstərilib.
Birləşmiş Ştatlar Dövlət Departamentinin mövzu ilə bağlı yaydığı rəsmi bəyanatda vurğulanır ki, İran tərəfindən dəstəklənən husilər Səudiyyə Ərəbistanı istiqamətində destruktiv və düşməncəsinə hərbi fəaliyyətlərini artırıblar:
“Husi qruplaşması tərəfindən həyata keçirilən pilotsuz uçuş aparatları və raket hücumları mülki əhali arasında tələfata, infrastrukturun zədələnməsinə, eləcə də beynəlxalq dəniz və hava nəqliyyatında ciddi fasilələrin yaranmasına səbəb olur”, – deyə açıqlamada qeyd olunub.
Eyni zamanda, Birləşmiş Ştatlar xarici işlər idarəsi beynəlxalq mediada yayılan bəzi iddialara da aydınlıq gətirib. Dövlət Departamenti ABŞ administrasiyasının Fars körfəzində yerləşən bütün ərəb ölkələrindəki diplomatik korpus heyətinə ölkələri tamamilə tərk etmək əmri verməsi barədə məlumatları rəsmi şəkildə təkzib edib.
Qeyd olunub ki, təxliyə göstərişi yalnız Səudiyyə Ərəbistanındakı qeyri-kritik diplomatik personala və onların ailə üzvlərinə şamil edilir.
Xatırladaq ki, Fars körfəzi və Yaxın Şərq regionunda hərbi-siyasi eskalasiyanın kəskinləşməsi fonunda xarici diplomatik missiyaların təhlükəsizliyinin təmin olunması aparıcı dövlətlərin əsas gündəm mövzusuna çevrilib.
