Afət Ziyadqızı
ABŞ Dövlət Departamentinin Konsulluq Məsələləri üzrə Bürosu “X” sosial şəbəkə platformasındakı rəsmi hesabında Yaxın Şərqdə bulunan ABŞ vətəndaşlarına yüksək dərəcədə ehtiyatlı və diqqətli olmaları ilə bağlı rəsmi xəbərdarlıq müraciəti edib.
"Operativ Məlumat Mərkəzi-OMM" xəbər verir ki, Türkiyənin "TRT Haber" telekanalının yaydığı məlumata əsasən, Birləşmiş Ştatlar xarici siyasət idarəsi bölgədə gərginləşən mürəkkəb təhlükəsizlik şəraiti səbəbindən mümkün aviabilet ləğvləri, hava məkanlarının gözlənilmədən bağlanması və beynəlxalq nəqliyyatda yaranacaq uzunmüddətli fasilələrin nəzərə alınmasını tövsiyə edib.
Açıqlamada Yəməndə yerləşən və İran tərəfindən dəstəklənən husi qruplaşmalarının Səudiyyə Ərəbistanı Krallığının ərazisinə təşkil etdiyi raket və dron hücumları xatırladılıb. Vurğulanıb ki, mülki obyektlərə və kritik infrastruktura dəyən zərər dəniz və hava nəqliyyatının fəaliyyətində ciddi fasilələr yaradıb.
Dövlət Departamenti bu cür təhlükəsizlik risklərinin və hərbi gərginliyin Yaxın Şərq regionunun hüdudlarından kənara sürətlə yayılma ehtimalının yüksək olduğuna diqqət çəkib.
“Yaxın Şərq ölkələrinə səfər edən və ya regiondan geri qayıdan Birləşmiş Ştatlar vətəndaşları beynəlxalq hava limanlarının və aviaşirkətlərin fəaliyyət statusunu daimi izləməli, eləcə də əvvəlcədən fövqəladə hal və təxliyə planları hazırlamalıdırlar”, — deyə rəsmi açıqlamada vurğulanıb.
