OMM Redaksiyası
Könül Əliyeva Azərbaycanın cüdo tarixinə düşdüyü üçün qürur duyduğunu bildirib. O, Birləşmiş Ərəb Əmirliklərinin paytaxtı Əbu-Dabidə keçirilən “Böyük Dəbilqə” turnirində 48 kq çəki dərəcəsində qızıl medal qazanıb.
“Çox sevincliyəm. İlk dəfədir ki, “Böyük Dəbilqə” turnirində medal qazanıram. Bu, mənim üçün çox gözəl və unudulmaz hissdir. Ümid edirəm ki, bu uğurun davamını gətirəcəyəm və bundan sonra daha böyük nailiyyətlər əldə edəcəyəm”, – 22 yaşlı idmançı deyib.
Əliyevanın sözlərinə görə, indiyədək Azərbaycan cüdosu tarixində qadın idmançı “Böyük Dəbilqə” turnirində çempion olmayıb. “Bu tarixi uğura imza atmaq və adımı tarixə yazdırmaq qürurvericidir. Bunun üçün çox xoşbəxtəm və qürur duyuram”, – o əlavə edib.
Cüdoçu qarşıdakı hədəflərindən də danışıb: “Bu, hələ başlanğıcdır. Qarşıda məni daha böyük hədəflər və uğurlar gözləyir. Əlimdən gələni edəcəyəm ki, həm ölkəmizi layiqincə təmsil edim, həm də xalqımızı sevindirim”.
Kontekst
Oktyabrın 29-da Əbu-Dabidə cüdo üzrə “Böyük Dəbilqə” turnirinə start verilib. Yarışın ilk günündə Azərbaycanın beş idmançısı mübarizəyə başlayıb.
