Afət Ziyadqızı
İsrailin cənubunda yerləşən Ovda və Nevatim aviabazalarına son 24 saat ərzində ABŞ ordusuna məxsus azı 10 hərbi nəqliyyat təyyarəsi eniş edib.
“Operativ Məlumat Mərkəzi-OMM” xəbər verir ki, bu barədə İsrailin dövlət televiziyası KAN məlumat yayıb.
Məlumata görə, təyyarələrin bir hissəsi ABŞ ordusunun Texas ştatında yerləşən hava hücumundan müdafiə mərkəzlərindən biri — "Fort Bliss" bazasından havalanıb. Daşınmaların İsraildəki hərbi ehtiyatların yenilənməsi və "Patriot" kimi əlavə hava hücumundan müdafiə batareyalarının təmin edilməsi məqsədi daşıdığı bildirilir.
KAN-ın xəbərində ABŞ-nin yaratdığı hava körpüsü əməliyyatının son saatlarda İordaniya, Səudiyyə Ərəbistanı və Qətərdəki bazalara enən nəqliyyat təyyarələrini də əhatə etdiyi iddia olunur.
Qeyd edək ki, "The Wall Street Journal" qəzeti daha əvvəl ABŞ Prezidenti Donald Trampın İrana qarşı mümkün hərbi hücum variantları ilə bağlı Mərkəzi Komandanlığın (CENTCOM) rəhbəri Bred Kuperdən xüsusi brifinq aldığını yazmışdı.
