İsrail ordusu gecə saatlarında Cibşit qəsəbəsinin El-Cebel məhəlləsində yerləşən yaşayış binasını bombalayıb.
"Operativ Məlumat Mərkəzi-OMM" xəbər verir ki, bu barədə Livanın rəsmi "NNA" xəbər agentliyi məlumat yayıb.
Dağılmış binanın dağıntıları altından Behçet ailəsinə mənsub biri uşaq olmaqla beş nəfərin cəsədi çıxarılıb.
Mülki müdafiə qruplarının axtarış-xilasetmə işlərini gecə boyu davam etdirdiyi vurğulanır.
Hərbi əməliyyatlar çərçivəsində Livanın cənubundakı Sur şəhərinin Şema və Nakura qəsəbələrində də evlər partladılıb.
Partlayış səsləri ətraf ərazilərdən eşidilib, eyni zamanda İsrailə məxsus pilotsuz uçuş aparatlarının sahil zolağında uçuşlar həyata keçirdiyi müşahidə olunub.
Səhər saatlarında isə Nəbatiyyənin Bint Cubeyl rayonuna aid Hanin qəsəbəsi hədəf alınıb. Nəticədə bölgənin infrastrukturuna, binalara və elektrik şəbəkələrinə ciddi ziyan dəyib.
Xatırladaq ki, İsrail ordusu martın 2-dən etibarən Livana intensiv hava hücumları başladaraq cənub bölgəsində bir çox ərazini nəzarətə götürüb.
Livan hökumətinin açıqlamasına əsasən, bu müddət ərzində məcburi köçkünlərin sayı 1 milyonu keçib, Səhiyyə Nazirliyi isə 2500-dən çox insanın öldüyünü təsdiqləyib.
ABŞ Prezidenti Donald Tramp aprelin 17-də qüvvəyə minən 10 günlük müvəqqəti atəşkəsin daha 3 həftə uzadıldığını elan etsə də, gərginlik səngimir.
Hazırda İsrail ordusu cənubda əməliyyatları davam etdirir, "Hizbullah" isə atəşkəsin pozulduğunu əsas gətirərək qarşı tərəfə zərbələr endirir.
