Afət Ziyadqızı
İsraildə keçirilən son rəy sorğusuna əsasən, Gadi Eisenkotun rəhbərlik etdiyi “Yashar” partiyası baş nazir Binyamin Netanyahunun “Likud” partiyasını dörd mandat qabaqlayıb.
“Operativ Məlumat Mərkəzi-OMM” xəbər verir ki, Kanal 12 üçün Midgam İnstitutu tərəfindən keçirilən sorğunun nəticələrinə görə, “Yashar” əvvəlki sorğu ilə müqayisədə bir mandat qazanaraq 25 deputatla ən böyük siyasi qüvvəyə çevrilib.
“Likud” isə iki mandat itirərək 21 deputatla ikinci yerdə qərarlaşıb.
Sorğunun nəticələrinə görə, İsrailin keçmiş baş naziri Naftali Bennettin rəhbərlik etdiyi “Birlikdə” siyahısı 13 mandat əldə edib.
Proqnozlara əsasən, Netanyahu liderliyindəki hakim blok 52, Eisenkotun rəhbərlik etdiyi blok isə 55 deputatla təmsil oluna bilər.
Yusuf Cabarinin rəhbərlik etdiyi Ərəb Birgə Siyahısının 7, Mansur Abbasın “Raam” partiyasının isə 4 mandat qazanacağı proqnozlaşdırılıb. Beləliklə, ərəb partiyalarının ümumi mandat sayı 11-ə çatıb.
Baş nazir seçimi ilə bağlı nəticələrə görə, sorğuda iştirak edənlərin 42 faizi Gadi Eisenkotun baş nazir olmasını dəstəkləyib. Binyamin Netanyahuya dəstək verənlərin payı isə 35 faiz təşkil edib.
Qeyd edək ki, İsrailin seçki sisteminə əsasən, hökumətin formalaşdırılması üçün 120 yerlik parlamentdə ən azı 61 deputatın dəstəyi tələb olunur. Sorğunun nəticələri seçkidən sonra hökumətin qurulması üçün mürəkkəb koalisiya danışıqlarının aparıla biləcəyini göstərir.
