Afət Ziyadqızı
ABŞ Prezidenti Donald Tramp administrasiyası Beynəlxalq Cinayət Məhkəməsinə (BCM) qarşı genişmiqyaslı sanksiyalar tətbiq etməyə hazırlaşır.
“Operativ Məlumat Mərkəzi-OMM” xəbər verir ki, bu barədə “The Wall Street Journal” (WSJ) qəzeti ABŞ rəsmilərinə və müvafiq sənədlərə istinadən məlumat yayıb.
Məlumata görə, planlaşdırılan məhdudiyyətlər 6-7 aylıq keçid müddətindən sonra BCM ilə həyata keçirilən maliyyə əməliyyatlarının böyük hissəsinin qadağan olunmasını nəzərdə tutur. Sanksiyaların məhkəmənin ABŞ dolları ilə əməliyyatlar aparmasına mane olacağı, bununla da qurumun qlobal maliyyə sisteminə çıxışını kəsərək fəaliyyətini ciddi şəkildə iflic edə biləcəyi vurğulanır.
Yekun qərarın nə vaxt elan ediləcəyi hələlik dəqiqləşməsə də, Birləşmiş Millətlər Təşkilatının Baş Assambleyası çərçivəsində və ya yaxın günlərdə təsdiqlənə biləcəyi bildirilir.
Xatırladaq ki, Donald Tramp Qəzza zolağındakı hərbi əməliyyatlarla bağlı İsrailin Baş naziri Binyamin Netanyahu və digər rəsmilər barəsində həbs qərarı çıxaran BCM-ni dəfələrlə kəskin tənqid edib. O, həmçinin ABŞ müttəfiqlərini məhkəmənin yurisdiksiyasından çıxmağa çağırıb.
