OMM Redaksiyası
Azərbaycan millisinin hücumçusu Renat Dadaşovun çıxış etdiyi “Bukovina”nın Ukrayna Premyer Liqasının 11-ci turunda “Livıy Bereq”lə səfər oyunu yarımçıq qalıb.
İlk hissədən sonra Kiyev vilayətində hava həyəcanı siqnalı verilib. Hava hücumu təhlükəsi uzun müddət davam etdiyindən komandalar ikinci hissəyə çıxa bilməyiblər.
İlk 45 dəqiqə “Bukovina”nın 1:0 hesablı üstünlüyü ilə başa çatıb. Qonaqların qolunu 23-cü dəqiqədə Vitali Qruşa vurub.
Ukrayna Premyer Liqasının qərarına əsasən, matçın qalan hissəsi noyabrın 1-də yerli vaxtla saat 12:00-da, Bakı vaxtı ilə 14:00-da oynanılacaq. Zədə səbəbindən Renat Dadaşov qarşılaşmanın iştirak ərizəsinə daxil edilməyib.
Kontekst
Oktyabrın 18-də məlum olub ki, Dadaşov budunun ön səthində əzələ yırtığı səbəbindən zədələnib. Həkimlərin proqnozuna görə, hücumçu noyabrın sonu və ya dekabrın əvvəlində yaşıl meydanlara qayıda bilər.
