OMM Redaksiyası
“Fənərbaxça Tarfin” basketbol üzrə turnirdə “Dubai Basketbol”a 76:66 hesabı ilə qalib gəlib. Bu nəticə ilə Türkiyə təmsilçisi mövsümdə keçirdiyi üç oyunun hamısında qələbə qazanıb. “Dubai Basketbol” isə ilk məğlubiyyətini alıb.
İlk periodda hücumda dəqiq oynayan və uzaq məsafədən dörd dəfə fərqlənən “Fənərbaxça Tarfin” hissənin sonlarında üstünlüyünü ikirəqəmli fərqə çatdırıb. Komanda ilk periodu 26:14 hesabı ilə öndə tamamlayıb.
İkinci periodda Boldvinin ardıcıl səbətləri fərqi 16-cı dəqiqədə 15 xala yüksəldib — 38:23. Ardınca 9:0-lıq seriya yaxalayan “Dubai Basketbol” fasiləyə 40 saniyə qalmış fərqi üç xala endirib. Tərəflər paltardəyişmə otağına “Fənərbaxça Tarfin”in 42:39 hesablı üstünlüyü ilə yollanıblar.
Üçüncü periodda komandalar ilk yeddi dəqiqə ərzində xal toplamaqda çətinlik çəkiblər. Bu hissəni 55:51 öndə başa vuran Türkiyə təmsilçisi son periodun gərgin keçən son dəqiqələrində də üstünlüyünü qoruyub və yekunda 76:66 hesabı ilə qalib gəlib.
