OMM Redaksiyası
Yunan-Roma güləşi üzrə dördqat dünya çempionu Eldəniz Əzizli Astanada keçirilən dünya çempionatından sonra idmançı karyerasını başa vurmaq niyyətindədir. 34 yaşlı güləşçi bu barədə Dünya Güləş Birliyinə (UWW) açıqlamasında bildirib.
Əzizli beşinci dəfə dünya çempionu olduqdan sonra peşəkar idmandan ayrılmaq istədiyini deyib. O, 55 kq çəki dərəcəsində yarımfinalda Gürcüstan təmsilçisi, son dünya çempionu Vaxtanq Loluaya 5:1 hesabı ilə qalib gələrək finala yüksəlib və ən azı gümüş medalı təmin edib.
Oktyabrın 25-də keçiriləcək finalda Azərbaycan güləşçisinin rəqibi iranlı Payam Əhmədi olacaq. Əhmədi ötənilki dünya çempionatının yarımfinalında Əzizliyə qalib gəlib, Azərbaycan təmsilçisi isə yarışı bürünc medalla başa vurub. Qarşıdakı görüş Əzizliyə revanş almaq və karyerasını beşinci dünya çempionluğu ilə başa vurmaq imkanı verəcək.
Əzizli 2018, 2022, 2023 və 2024-cü illərdə dünya çempionu olub.
Kontekst
Oktyabrın 23-də Astanada keçiriləcək dünya çempionatının ilk günündə çıxış edəcək Azərbaycan millisinin ilkin mərhələdəki rəqibləri müəyyənləşib. Eldəniz Əzizli (55 kq) püşkatmaya əsasən ilkin mərhələdə güləşməyəcək dörd idmançıdan biri olub.
