OMM Redaksiyası
Bu gün Çində transsərhəd telekommunikasiya və kiberdələduzluğa qarşı mübarizə üzrə beynəlxalq alyans yaradılıb.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Bildiriib ki, alyansın təsis konfransı Çinin şərqində yerləşən Lianyungang şəhərində keçirilib.
Tədbirdə 46 təsisçi ölkənin, 34 müşahidəçi ölkənin, BMT və İnterpol da daxil olmaqla dörd beynəlxalq təşkilatın nümayəndələri iştirak edib.
Çin hökumətinin təşəbbüsü ilə yaradılan alyans müxtəlif ölkələrin hüquq-mühafizə orqanları arasında əməkdaşlığın gücləndirilməsinə xidmət edən hökumətlərarası təşkilatdır. Təşkilatın əsas məqsədi transsərhəd telekommunikasiya və kiberdələduzluq, eləcə də bununla əlaqəli cinayətlərlə mübarizədə beynəlxalq əməkdaşlığı təşviq etməkdir.
Konfransda Çinlə yanaşı, alyansın təsisçi ölkələri olan Vyetnam, Laos, Keniya, Kamboca, Pakistan və Rusiyanın nümayəndələri də çıxış ediblər.
Konfransın yekununda telekommunikasiya və kiberdələduzluğun beynəlxalq əməkdaşlığın gücləndirilməsini tələb edən qlobal problemə çevrildiyi nəzərə alınaraq, alyansın yaradılması ilə bağlı birgə bəyanat qəbul edilib.
