"Bayern"in idman direktoru Maks Eberl Nikolas Cekson, Maykl Olise və Manuel Noyerin klubdakı gələcəyi barədə danışıb.
“Operativ Məlumat Mərkəzi-OMM”-in xəbərinə görə, funksioner təsdiqləyib ki, Münxen təmsilçisi "Çelsi"dən Ceksonun 65 milyon avroluq satınalma opsiyasından istifadə etməyəcək.
Bu mövsüm Bundesliqada 7 qol vurmasına baxmayaraq, hücumçu əsasən Harri Keynin əvəzedicisi rolunda çıxış edib. Nəticə etibarilə, mövsüm başa çatdıqdan sonra o, London klubuna geri dönəcək.
Digər oyunçulara gəldikdə isə, Eberl Maykl Olisenin satışının qətiyyən gündəmdə olmadığını vurğulayıb. Onun sözlərinə görə, gənc futbolçu komandada mükəmməl inkişaf edir.
Təcrübəli qapıçı Manuel Noyer barədə də müsbət fikirlər səsləndirən idman direktoru, onun "Bayern" üçün bir əfsanə olduğunu qeyd edib: "Biz oturub sakitcə danışacağıq. Əgər Manuel hazır olarsa, müqaviləsinin daha bir il uzadılmasına heç nə mane ola bilməz".
