OMM Redaksiyası
İspaniyanın "Real Madrid" klubu heyətini gücləndirmək istiqamətində növbəti addımını atmağa hazırlaşır.
"Operativ Məlumat Mərkəzi-OMM" xarici KİV-ə istinadən xəbər verir ki, Madrid təmsilçisinin transfer siyahısında Fransa millisinin və Almaniyanın "Bavariya" klubunun yarımmüdafiəçisi Maykl Olise xüsusi yer tutur.
"Kral klubu" fransalı vingeri transfer etmək üçün 2026-cı ildə keçiriləcək Dünya Çempionatının başa çatmasını gözləyir.
ABŞ, Kanada və Meksikanın ev sahibliyi edəcəyi mundial 11 iyun - 19 iyul tarixlərini əhatə edəcək. Məhz bu turnirdən sonra Madrid rəhbərliyinin oyunçu üçün rəsmi təklif irəli sürəcəyi gözlənilir.
Futbolçunun hazırkı bazar dəyəri kifayət qədər yüksəkdir. "Transfermarkt" portalının ekspertləri 22 yaşlı oyunçunun qiymətini 150 milyon avro səviyyəsində qiymətləndirirlər. Xatırladaq ki, Olisenin "Bavariya" ilə hazırkı müqaviləsi 2029-cu ilin iyun ayının sonuna qədər qüvvədədir.
