OMM Redaksiyası
Bu gün Tbilisidə qarışıq döyüş növləri (MMA) üzrə dünya çempionatı start götürəcək. Beynəlxalq Qarışıq Döyüş Növləri Federasiyasının (IMMAF) himayəsi altında keçirilən yarış noyabrın 1-dən 7-dək davam edəcək.
Çempionatda 60-dan çox ölkədən 820-dən artıq idmançının iştirakı gözlənilir. Kişilər və qadınlar müxtəlif çəki dərəcələrində mübarizə aparacaqlar.
Yarışın ilk günündə komandaların qeydiyyatı, qaydalarla bağlı təlimatlandırma və püşkatma keçiriləcək. Döyüşlər noyabrın 2-də başlayacaq. Noyabrın 3-də 1/16 final, 4-də 1/4 final, 5-də isə yarımfinal qarşılaşmaları olacaq.
18-20 yaşlı idmançıların final döyüşləri noyabrın 6-da, böyüklərin finalları isə 7-də keçiriləcək. Azərbaycan millisi MMA Federasiyasının prezidenti Rövşən Həsənovun rəhbərliyi altında çıxış edəcək. Komandanın heyətində Ələkbər Mahmudov, Qabil Əlizadə, Saleh Cəfərov, İsmət Bədəlov, Həsən Məhəmmədqazı, Əli Ataşov və Elmir Allahverdiyev yer alıblar.
