Azərbaycanın iki karateçisi dünya çempionatının finalına yüksəlib

Azərbaycan karateçiləri Vüsal Qənbərov və Şamo Kamilov Polşanın Belsko-Biala şəhərində keçirilən yeniyetmə və gənclər arasında dünya çempionatının finalına yüksəliblər.

İdmançılar ilkin mərhələdə keçirdikləri bütün görüşlərdə qalib gəliblər. Bununla da hər ikisi ən azı gümüş medalı təmin edib.

Qənbərov 16 yaşadək idmançılar arasında 55 kq çəki dərəcəsində, Kamilov isə 14 yaşadək karateçilərin 70 kq-dan yuxarı çəki kateqoriyasında mübarizə aparır. Onların final görüşləri bu gün keçiriləcək.

Azərbaycanın daha iki təmsilçisi də bürünc medal qazanmaq şansını saxlayır. Fatma Hacıyeva (U16, 59 kq) oktyabrın 17-də, Rəşid Süleymanov (U21, 75 kq) isə oktyabrın 18-də üçüncü yer uğrunda görüşə çıxacaq.

Beləliklə, Azərbaycan komandası dünya çempionatında artıq iki medalı təmin edib və yarışı dörd mükafatla başa vurmaq imkanı var.